Naxçıvan Muxtar Respublikasının Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin təşkilatçılığı ilə "Qadın əməyinin tətbiqi və əmək münasibətində olan qadınlar üçün güzəştlərin verilməsi" mövzusunda maarifləndirici tədbir keçirilib.
Tədbirdə Naxçıvan Muxtar Respublikasının Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin rəis müavini Azər Qasımovun, Naxçıvan Muxtar Respublikasının Ailə Qadın və Uşaq Problemləri üzrə Dövlət Komitəsinin, Naxçıvan Muxtar Respublikası Həmkarlar İttifaqları Şurasının və Azərbaycan Respublikası Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin tabeliyində Əməyin Muhafizəsi publik hüquqi şəxsinin Naxçıvan filialının nümayəndələrinin mövzu ilə bağlı çıxışları dinlənilib.
Tədbir zamanı müəssisə və təşkilatlarda qadınların əmək hüququ, onların əməyindən qanunvericiliyə uyğun istifadə edilməsi, həmçinin Azərbaycan Respublikasının Əmək Məcəlləsində və əmək qanunvericiliyinə dair digər normativ hüquqi aktlarda müəyyən olunan güzəştlər, imtiyazlar və əlavə təminatlar haqqında ətraflı məlumat verilib. O cümlədən tədbirdə qadınların hüquq bərabərliyi və onların cəmiyyətdəki strateji rolunun yüksək qiymətləndirilməsi xüsusi olaraq vurğulanıb. Əməyin Mühafizəsi Mərkəzi publik hüquqi şəxsinin fəaliyyət istiqamətləri və iş yerlərində attestasiyanın keçirilməsi ilə bağlı iştirakçılara ətraflı məlumat verilib.
Qeyd edək ki, 46 dövlət və qeyri-dövlət müəssisədən 72 nümayəndənin iştirak etdiyi tədbirdə mövzu ilə bağlı suallar cavablandırılıb.
Sosial şəbəkələrdə də bizi izləyin:
